Акбаш авылы «Карлыгач» балалар бакчасында “Нәүрүз” бәйрәмен каршы алдылар
Акбаш авылының “Карлыгач” балалар бакчасында ата-аналар һәм балалар “Нәүрүз” бәйрәме үткәрделәр. Сабыйлар янына Нәүрүзбикә дә килде, төрле уеннар оештырдылар.
Сабыйлар язгы табигать турында шигырьләр сөйләделәр, әниләре, тәрбияче апалары бергә татар халкының милли уеннарын уйнадылар, ә соңыннан барысы бергә түгәрәк өстәл артына җыелышып карга боткасыннан авыз иттеләр.
Язның көн белән төн тигезләшкән вакыты - 21 – 22 март – Нәүрүз бәйрәме буларак билгеләп үтелә. Нәүрүз – язны каршылап, язгы чәчү эшләре алдыннан үткәрелә торган халык бәйрәме ул.
– Бакчада башка халыкларның да милли бәйрәмнәрен менә шулай матур итеп оештырабыз, - ди “Карлыгач” балалар бакчасы тәрбиячесе Нурия Нигъмәтҗанова. - Менә шундый бәйрәмнәребез аша балаларда халыкларның йолаларына, гореф-гадәтләренә кызыксыну уяту һәм мәрхәмәтле, игътибарлы, әхлаклы балалар тәрбияләү бакчаның төп максаты.